د افغانستان د امانت ځانګړی صندوق د هېواد د حیاتي خدماتو ملاتړ اعلان کړ
د افغانستان لپاره د امانت ځانګړي صندوق اعلان کړی چې د خپلو شریکانو په همکارۍ به د عامه خدمتونو حیاتي سیستمونو ملاتړ وکړي. یاد صندوق وايي، دا ملاتړ به د روغتیا په برخه، د تجدیدېدونکي انرژۍ تاسیساتو او د اوبو رسولو شبکو کې وي څو د هېواد بنسټیز خدمتونه دوام وکړي.
دې ادارې ټینګار کړی چې د بنسټیزو خدمتونو فعال پاتې کېدل د خلکو د ژوند د شرایطو په ښه والي او د ټولنو د مقاومت په پیاوړتیا کې مهم رول لري. د صندوق په وینا، هرکله چې اساسي خدمتونه په منظم او پایدار ډول وړاندې شي، د لا زیات ټولنیز ثبات او ودې زمینه برابریږي.
افغانستان په وروستیو کلونو کې د عامه خدمتونو په برخه کې له پراخو ستونزو سره مخ شوی دی. د مالي سرچینو محدودیتونه او د طالبانو تر ادارې لاندې جوړښتي ستونزې د ډېرو اوسېدونکو لپاره د معیاري خدمتونو ترلاسه کول ستونزمن کړي دي.
د افغانستان لپاره د امانت ځانګړی صندوق چې د ملګرو ملتونو تر چتر لاندې فعالیت کوي، خپل هدف د هغو سیستمونو د ساتنې او پیاوړتیا په توګه یاد کړی چې د ضروري خدمتونو وړاندې کولو ته لاره هواروي؛ یو ګام چې د عامه هوساینې په ښه والي او د ټولنو د زیانمنېدو د کچې په کمولو کې مهم رول لوبولی شي.
