د مکې او مدينې ترمنځ ترافيکي پېښه؛ لسګونه هندي عمره کوونکي وژل شوي
په سعودي عربستان کې د يوې دردناکې ترافيکي پېښې له امله يو بس چې هندي عمره اداکوونکي پکې سپاره وو، د مکې او مدينې ترمنځ د المفرحات په سيمه کې له يو تېلو بار ټانکر سره ټکر کړی، چې له امله يې دواړو وسايطو ته اور واوښت. دا پېښه د دوشنبې سهار رامنځته شوې او د هند لسګونه وګړي يې وژلي دي.
د راپورونو له مخې، په دغه بس کې تر ۴۰ ډېر کسان سپاره وو. د پيښې وروسته اور دومره سخت وو چې، د ځايي رسنيو په وينا، د ډېرو سپرليو د ژغورنې هېڅ چانس نه وو پاتې.
د هند لومړي وزیر نريندرا مودي د پېښې د قربانيانو له کورنيو سره خواخوږي ښودلې ده او زياته کړې يې ده چې د هند حکومت د سعودي له چارواکو سره د خپلې سفارتخانې او کونسلګرۍ له لاري په تماس کې دی. همداراز، د هند د بهرنيو چارو وزير ایس. جي. شانکار ويلي، د متضرر شويو کسانو او د هغوی د کورنيو د مرستې لپاره لازم اقدامات د هند له دیپلوماتیکو ادارو لخوا روان دي.
د پېښې نه وروسته، د هند قونسلګرۍ په جده کې د مرستې رسولو او د ژوبل شويو کسانو درملنې او د مړو انتقال تنظيم لپاره عملياتي خونه جوړه کړې ده. هڅې روانې دي چې د پېښې د علت دقیق جزئيات او د قربانيانو پیژندنه څرگنده شي.
په سعودي عربستان کې په تېره بيا د حج او عمرې په موسم کې د دا ډول پېښو زياتېدل اندېښنې راپارولي دي. د ټرانسپورټ د وسايطو د څار او زائرينو د امنيت په اړه وار له مخه د پام وړ نيوکې شوي. د ميليونو زائرينو د سړکونو امنيت د سعودي حکومت پر غاړه دی، خو ډېر ځل د ناکافي تدابيرو له امله پر دې حکومت نيوکې شوې دي.
